مسكات للبنات لعندهم مناسبة على غفلة

السلام عليكم البنات كيفما كتعرفو فوقت القراية ولا الخدمة كنكونو مشغولين مع الامتحانات والقراية ومعا العيا ديال الخدمة مكنبقاوش مهليين فراسنا بحال اوقات الفراغ وكتولي البشرة ديالنا ماشي ناصعة وباين عليها لعيا ومنين كتجينا شي عراضة على غفلة كنبغيو نكونو غزالات , وانا وجدتليكم وصفات بساط بزااف ومكيخدوش الوقت بزاف ومتواجدة فديورنا كاملين

بالنسبة للكوماج: اللي غادي نديرو فيه معلقة عدس مطحونة 2 معالق بودرة نيدو 3 معالق الماء ولا من الاحسن الما الورد كنديروها لمدة نصف ساعة ونبداو نفركو خصوصا الانف حيت كيتجمع الوسخ تماك بزاف (بالنسبة للعدس نتوما عارفين الفوائد ديالو حيت فيه الفيتامين B وهو مزيان للبشرة بزاف) هاد الماسك فعال بتجربة شخصية 

للبشرناصعة: غادي دير 2 معالق العسل الحر+عصير خيارة لمدة 15 دقيقة (اللي بشرتها حساسة من السكر بلا متديرو) 

العينين :انا العينين ديالي ايلا كنت بغيت باش ترسم فيهم الكحلة مزيان والمكياج. بالليل منين نبغي نعس كندير البومادة الصفرة اللي معروفة انها كتصلح لكلشي وراها تتنقي العينين من الاوساخ وكتصفيها وكتصفي حتى جفون العين فالصباح تتبنليك العين صافية مزيان. 

للشفايف : قبصة ملحة +زيت الزيتون ديرهم كوماج 5 دقائق. 

للاسنان :كاينة وصفة دقى بطلة كاتخدي فاخرة صغيرة كدقيها تتولي غبرة ونزيد عليه معلقة عصير الحامض ونحكو بيها السنينات .بالنسبة اللي مكتبغيش الفاخر دير غير عصير الحامض وشوية دالملحة حتى هما مزيانين بزاف هاد الوصفات تتحيد ديك الصفورية واللي بغات سنانها يلمعو تاخد قشرة ديال حامضة وتحك بيها.

 اليدين :كتخدي شوية ديال سكر الكلاصي +كريم ولا فازلين اللي موجود وكدلكو يديكم من 10 الى 15 دقيقة وكتغسلو بالماء وكدهنو يديكو بالكريم (انا كنفضل نيفيا). 

وهنتي وجدى بصحة وراحة

كتب في: الجمال والأناقة,عالم حواء